Jubileumscup - Trott IL

Fotball-VM i Nordbygdohalllen I høve Trott sitt 75-årsjubileum blei det skipa turnering for spelarane i Trott, laurdag 11. november. Turneringa var for spelarane 9-12 og 13-15 år. Den eine spelaren uttala, «eg visste at ho var god, for eg ser ho sentrar med venene sine i friminutta». Denne dagen var guten i 5. klasse på lag med denne gode jenta som går i 7. klasse. Laga var blanda på tvers av alder og kjønn. Fleire hadde kome på lag med mange dei ikkje kjende. Det er løye med det. Etter første kamp var isen broten, og dei kjempa som eitt lag, med fargane til blant anna Ukraina, Argentina, England og Brasil måla i fjeset. Eg vil vera forsiktig med å trekka fram enkeltpersonar, men at Bernt Christian Simonsen, styret og Hanne Nesbø, ungdomsrådet har vore spydspissar for arrangementet trur eg trygt me kan seia. Elles hjartans takk til alle som var med og gjorde det mogleg. Før dei eldste ungdommane skulle i gang, blei det spelt 20 kampar fordelt på 13 lag. Stemninga var sett, og det var knytt stor spenning til kven som kom til å dra det lengste strået i verdsmeisterskapen for dei eldste spelarane. I sluttspelet skulle Spania møta Argentina, medan Brasil møtte Tyskland i sin semifinale. Leia av ein opplagt Ludvig «Ludinator» Haugland, og Mie «Pique» Ness Valvatna vann Spania. I den andre semien førte "jekken" Tyskland i leiinga. Like etter kvitterte Ole «Dunga» Sørebø frå straffemerket etter at Johannesen var oppe med ei guddommeleg hand i straffefeltet. Kampen bølga fram og tilbake, og etter ekstraomgangar blei Mio tunga på vektskåla. Endå ein finale for Brasil var eit faktum. I finalen vinn Brasil. Lagkaptein Rakel Brosvik viste veg for resten av laget gjennom turneringa. Eit verdig punktum på eit aldeles makelaust arrangement, på dagen Olaug Tvedten blei seriemeister med Vålerenga i Toppserien. Til saman blei det spelt 35 kampar denne laurdagen, og snaue 190 unge blåkledde var i sving på sine respektive lag. Magnar Larsen, far og tilskodar

Publiseringsdato 12.11.2023